Satzung

Statuten för den Vereen „De Plattdütschen“ e.V.

 

§ 1 Noom un Sitt
  1. De Vereen driggt den Noom „De Plattdütschen“ e.V. He hett sinen Sitt in Stood.
     
  2. He is in dat Vereensregister bi dat Amtsgericht Tostedt ünner VR 100524 indrogen.
§ 2 Zweck
  1. De Vereen verfolgt bloots un direktemang gemeennützige Zwecke in ‘n Sinn von den Stremel „Steuerbegünstigte Zwecke“ von de Afgobenornung.
     
  2. Zweck von den Vereen is de Pleeg von Kultur un Heimotkunn. De Zweck von de Statuten warrt besünners ümsett dörch de Pleeg von de Nedderdüütsche Sprook in Woort un Schrift in Scholen un in Kinnergoorns un annere Gelegenheiten mit Vördrääg usw. Dörch de Utgoov von Böker un annern Krom, de dat Lihrn von de Nedderdüütsche Sprook stütten deiht.
     
  3. De Körperschop is sülvstlos tätig; se verfolgt nich in ierste Linie egenweertschaftliche  Zwecke.
     
  4. Middel von den Vereen drööft bloots för Zwecke insett warrn, as se in disse Statuten stoht. Mitglieder kriegt keen Towenn ut Middel von den Vereen.
     
  5. Keeneen Persoon dröff dör Utgoben, de den Zweck von den Vereen frömd sünd, oder dör utermoten hoge Vergöden beter stellt warrn.
§ 3 Mitgliedschop
  1. Mitglied von den Vereen kann jeedeen natüürliche oder juristische Persoon warrn, de den Vereen ünnerstütten deit.
     
  2. Öber den Andrag to de Opnohm in den Vereen hett de Vörstand dat letzte Woort.
     
  3. De Mitgliedschop höört op dör Dood, Utsluss, Strieken von de Mitgliederlist oder dör Uttritt ut den Vereen. De Uttritt is bloots to ‘n Enn von ‘t Geschäftsjohr mööglich. He mutt to Papier bröcht un den Vörstand vörleggt warrn.
     
  4. Wenn een Mitglied gegen de Intressen von den Vereen Unrecht doon hett oder trotz  Anstöten mit den Bidrag för een Johr torüch blifft, kann dat Mitglied von den Vörstand op  de Steed utsloten warrn. Man vörher mutt dat Mitglied sik utspreken un wehren könen. Gegen den Besluss kann dat Mitglied bi de Mitglederversammeln gegenan gohn
§ 4 Bidrääg
  1. De Mitglieder betohlt Bidräg so as dat de Mitgliederversammeln besloten hett. För dat Fastsetten von de Bidrääg is eenfache Mehrheit nootwennig.
§ 5 Organe von den Vereen
  1. Organe von den Vereen sünd de Mitgliederversammeln un de Vörstand.
§ 6 De Vörstand
  1. De Vörstand besteiht ut fief Vörstandsmitglieder, den eersten, den tweeten un den drütten Vörsitter, den Kassenföhrer so as den Schriftföhrer.
     
  2. Vörstand no § 26 BGB sünd de 1. oder de 2. Vörsitter. Jeder dröff för sik alleen den Vereen vertreden.
     
  3. De Vörstand hett dat lopen Geschäft von den Vereen op de Reeg to holen.
     
  4. Bi ielige Soken kann de Vörstand eenen Besluss uk schriftlich oder telefonisch fastleggen, wenn keen Vörstandsmitglied dorgegen is.
     
  5. De Vörstand ward von de Mitgliederversammeln op de Duur von dree Johr wählt.  Wedderwohl is mööglich. De Vörstandsmitglieder blievt bit to de Wohl von jemehr Nofolger in ‘t Amt.
§ 7 Mitgliederversammeln
  1. De Mitgliederversammeln is in dat eerste Quartaal von jeedeen Johr aftoholen.
     
  2. Uterornliche Mitgliederversammeln sünd to beropen, wenn dat Interess von den Vereen  dat nootwennig mookt oder de Berufung von een Drüttel von all de Vereensmitglieder  von den Vörstand verlangt ward; dorbi mööt de Grünnen angeben warrn.
     
  3. De Mitglieder ward to Versammeln schriftlich dör den 1. Vörsitter, den 2. Vörsitter oder  den 3. Vörsitter inloodt. Een Inlodungsfrist von twee Weken mut inholen un dorbi uk de Tagesornung künnigt mookt warrn.
     
  4. Jeedeen Mitglied kann bit to een Week vör een Mitgliederversammeln bi den Vörstand  op schriftliche Oort noch wat to de Tagesornung tostüürn.
     
  5. De Mitgliederversammeln wählt all dree Johr den Vörstand.
     
  6. De Mitgliederversammeln is de Johresreken un de Johresbericht schriftlich vörtoleggen, dormit se öber de Genehmigung un Entlastung besluten kann. De Johresreken ward eenmol in ‘t Johr von twee von de Mitgliederversammeln bestellte Kassenprüfer  dörkeken, schriftlich optekend un op de Mitgliederversammeln vördrogen.

    De Mitgliederversammeln bestimmt uk noch öber:
    a) den Huushaltsploon
    b) de Mitgliederbidrääg
    c) Andrääg
    d) An- un Verkoop von Grundstücken
    e) Bedeligung an Gesellschopen
    f) Opnehmen von Darlehn
    g) Ännerung von de Statuten
    h) Oplösen von den Vereen
     
  7. Öber dat, wat op de Mitgliederversammeln besloten ward, is een Protokoll to föhren, dat von twee Vörstandsmitglieder to ünnerschrieben is.
     
  8. De Vörstand kann för sienen Tiet- un Arbeitsopwand ene pauschale Vergütung no § 3 Nr. 26a EStG kriegen.
§ 8 Oplösen von den Vereen un „Anfallberichtigung“

  1. För den Besluss, de Statuten to ännern oder den Vereen optolösen is een Mehrheit von dree Viddel von all de Mitglieder nootwennig, de bi de Versammeln mit bi sünd. De Besluss kann bloots foot warrn, wenn dat rechttiedig in de Inlodung künnigt mookt worrn is.
     

  2. Bi Oplösung oder Wegfall von de stüürbegünstigten Zwecke fallt dat Vermögen von den Vereen an den Landkreis Stood, de dat unmiddelboor un för nix anners as för gemeennützige Zwecke in ‘n Landkreis Stood to verwennen hett.
     

  3. Allens, wat öber dat Verwennen von dat Vereensvermögen besloten ward, in den Fall at de Vereen oplööst worrn is, dröff eerst no dat Inwilligen von dat Finanzamt ümsett warrn.

 

--

Stood, den 25. Juni 2002

ännert op de Mitgliederversammeln an ‘n 11.04.2017 un an ‘n 10.04.2018

Plattdüütsche - Protokoll der JHV 2019 - 09.04.